Mukesh Khanna ne Ramayana mein Ranbir Kapoor ke roop aur VFX par uthaye sawal

Nitesh Tiwari ki aane wali mahakavya film Ramayana ko lekar abhi se kafi charcha hai. Hal hi mein is film ke promotional material ko lekar logon ki mili-juli pratikriyaen samne aayi hain. Kai darshakon ne Ranbir Kapoor ko Bhagwan Ram ke roop mein cast kiye jane par aalochana ki hai. Ab abhi abhineta Mukesh Khanna ne bhi film mein Bhagwan Ram ke chitran par apatti jatayi hai.

Mukesh Khanna ne Ramayana ke scene par kya kaha?

Bollywood Now ko diye gaye ek sakshatkar mein Mukesh Khanna ne bataya ki Ramayana ka trailer dekhne ke baad unhe kis baat ne pareshan kiya. Unhone film mein Shri Ram ke chitran par aalochana karte hue kaha ki unke kirdaar ko ek 'Dhurandhar' ke roop mein pesh kiya gaya hai. Unhone kaha ki Shri Ram ek shaktishali divya vyaktitva aur bhagwan ke avtar the, lekin film mein dikhaye gaye fight sequence unke swabhav ke anusaar nahi hain. Unhone vishesh roop se us scene par apatti jatayi jisme Shri Ram ped par chadhakar teer chalate hue nazar aate hain.

Salman Khan aur Amitabh Bachchan se ki tulna

Mukesh Khanna ne kaha, Aapne unko Salman Khan, Amitabh Bachchan, Rajinikanth bana diya hai. Nahi sahab, Ram Ram hain. Maryada Purushottam Shri Ram. Woh smile karte the, yahan tak ki samudra se bhi hath jodkar rasta mangte the. Unhone aage kaha ki agar aap Shri Ram ko Maryada Purushottam ke roop mein dikhane ke bajaye ek action hero ya Clint Eastwood ki tarah pesh karenge, to yah sahi nahi lagega. Agar woh is tarah ladte, toh vanar sena ki madad ki kya zarurat padti.

VFX aur Bharatiya aastha par chinta

Shaktimaan fame abhineta ne film ke VFX ko lekar bhi apni chinta vyakt ki. Unhone kaha ki vishesh prabhav (VFX) videshi darshakon ko aakarshit kar sakte hain, lekin Bharatiya darshak ise apni aastha aur sanskriti ke nazariye se dekhenge. Unhone kaha ki yah film bharat ki aane wali peedhi aur aastha ke anusaar honi chahiye.

Bata dein ki Nitesh Tiwari dwara nirdeshit is film mein Ranbir Kapoor Bhagwan Ram aur Bhagwan Parshurama ki dohari bhumika mein nazar aayenge. Is film mein Sunny Deol, Yash, Sai Pallavi, Ravie Dubey aur Arun Govil jaise kalakar bhi mukhya bhumikaon mein hain. Yeh film do bhagon mein release hogi, jiska pehla bhag Diwali 2026 aur dusra bhag Diwali 2027 mein cinema ghron mein aayega.